Myint Shwe took a journalism program from Ryerson University 2004

Loading...

Sunday, December 11, 2011

နိုင်ငံရေးမီးရှူး မီးပန်းများ နှင့်တကယ့်လက်တွေဘ၀

 









ဒီဇင်ဘာ ၁၁ - ၂၀၁၁



ခရစ္စမတ်ရာသီဖြစ်၍ကမ္ဘာ့တ၀ှမ်းတွင်မောလ်များ (shopping malls) ၌ခလေးသူငယ်များဆန်တာကလော့စ်နှင့်တွဲ၍ဓါတ်ပုံရိုက်ခံကြချိန်ဖြစ်သည်။
မြန်မာပြည်တွင်ကားဒေါ်အောင်ဆန်းစုကြည်သည် မိမ္မ-ဆန်တာ (female Santa Claus) ဖြစ်နေရသည်မှာကြာပြီ။ ပြည်တွင်းကော နိုင်ငံရပ်ခြားများမှ ပါအခွင့်အရေးရနိုင်သူတိုင်းသူမနှင့်တွဲ၍ဓါတ်ပုံရိုက်ခံလိုကြသည်။ Group photo ထည်းမှာထက်နှစ်ဦးတည်းတွဲ၍ရိုက်ခွင့်ရလျှင်ကား ပြောဘွယ်ရာမရှိပြီ။


အစိုးရသစ်နှင့်သူမတို့ ယုံကြည်မှုတည်ဆောက်ခဲ့ပြီးသည့်နောက်မြန်မာနိုင်ငံ
သည်ယခုမှကမ္ဘာ့မြေပုံပေါ်သို့ ရောက်လာသည်ဟုပြောရမ လောက်မြန်မာနှင့် ပါတ်သက်သောသတင်းများကမ္ဘာ့ထိပ်တန်းသတင်းစာကြီးများတွင်နေ့ စဉ်
လောက်နီးပါးပါလာသည်သာမကသတင်းကောင်းများလည်းဖြစ်သည်။

“Clean government, good governmentဖြစ်ရမည်ဟုသမတကြီးကပြောကြောင်း - ”

-“အမျိုးသားရေးအတွက်အားလုံးနှင့်ပါဝင်နိုင်အောင်ဆောင်စီမံရွက်မည်”

“မြစ်ဆုံပရိုဂျက်အများပြည်သူလက်မခံကြောင်းသိရ၍ရပ်ဆိုင်းထားလိုက်” -

 “လွှတ်တော်ကဒီမိုကရက်တစ်ဥပဒေများတစ်ခုပြီးတစ်ခုပြုနေ၍သမတကြီး ကလည်းလက်မှတ်တွင်တွင်ထိုးပေးနေ” -

ရှေ့နှစ်အရှေ့တောင်အာရှကျွှန်းဆွယ်အားကစားပွဲမြန်မာပြည်တွင်ကျင်းပ မည်။၂၀၁၄တွင်အာဆီယင်အလှည့်ကျခေါင်းဆောင်မှုမြန်မာကိုအပ်နှင်းမည်-

ငွေကြေးအကူအညီတွေကိစ္စဆွေးနွေးရန် IMF ကိုယ်စားလှယ်မြန်မာပြည်လာသွား - 
ဂျပန်က ODA ပြန်ပေးတော့မည် - EU, Australia နှင့် USA  တို့ မှရင်းနှီးမြုတ်နှံလို သူများတဖွဲဖွဲလာရောက်လေ့လာနေကြပြီ။

‘လိပ်’နှင့်‘ကန်’အစိုးရများကလူသားအကျိုးပြုအကူအညီများပေးလာ -

နှစ်ငါးဆယ်အတွင်းပထမဆုံးအကြိမ်အမေရိကန်နိုင်ငံခြားရေးဝန်ကြီး
ကိုမဖိတ်ရဘဲနှင့်ဆိုက်ဆိုက်မြိုက်မြိုက်လာ - 

ပြည်ပရောက်အင်အားစုများကိုပြန်လာကြရန်ဖိတ်ခေါ်ကြောင်း -
စံနစ်သစ်တည်ဆောက်ရာတွင်ပညာတတ်များပါဝင်လာကြရန် လိုကြောင်းအစိုးရပြော -

ကမ္ဘာလှည့်နိုင်ငံခြားဧည့်သည့်တွေအ၀င်များလာ-ဟော်တယ်တွေအခန်းပြည့်

ဒေါ်အောင်ဆန်းစုကြည်နိုဘဲလ်ငြိမ်းချမ်းရေးဆုရသည့်နှစ် ၂၀ ပြည့်အထိမ်း အမှတ်ကျင်းပ -

ဗိုလ်ချုပ်အောင်ဆန်းအတ္ထုပတ္တိဇာတ်လမ်းရုပ်ရှင်ရိုက်တော့မည် -
မြန်မာရုပ်ရှင်လောကသား၁၀၀ ကျော်နှင့်တွေ့ ဆုံ -

ပြည်တွင်းပုံနှိပ်မီဒီယာစာမျက်နှာများတွင်ကောင်းသတင်းများဝေေ၀ဆာဆာ
ဖြစ်နေသည်။ ပြည်သူများအဖို့ စာစောင်မျက်နှာဖုံးများပေါ်တွင်အောင်ဆန်း စုကြည်၏ပုံများကိုတွေ့ မြင်လာရခြင်းကိုသိသာသောပွင့်လင်းလွပ်လပ်
လာမှုဟုယူဆနေကြသည်။ 

ဤကောင်းသတင်းများသည်သာမန်လူထုခံစားနိုင်သည့်အဆင့်သို့ 
အထိအကျိုးသက်ရောက်မှုများရှိလာပြီလား။

နိုင်ငံရေးမီးရှူးမီးပန်းများကိုမြေပြင်ကတကယ့်ဘ၀နှင့်ဆက်စပ်၍စစ်ဆေးကာ 
Realty check လုပ်ကြည့်ဘို့ တော့လိုမည်။

ရှေးဦးစွာပြောရလျှင်လူထုသည်ဤသတင်းများကိုဂျာနယ်များတွင်ဖတ်နေကြ 
ရခြင်းမှာဖတ်စရာ (ပုဂ္ဂလိက) သတင်းစာမရှိသေးသောကြောင့်ဖြစ်သည်။ယခု ဖတ်နေကြသောသတင်းများတွင် ၂၀၀၇ ခုနှစ်အရေးအခင်းတုံးက၀င်သွားခဲ့
သောမင်းကိုနိုင်၊ကိုကိုကြီးအပါအ၀င်အများစ်ိတ်ဝင်စားသောနိုင်ငံရေး 
သမား များ (ဇာဂနာမှအပ) လွတ်လာသည့်သတင်းမဖတ်ကြရသေး။
ဒီမိုကရေစီသို့ ကူးပြောင်းရေးနောက်ကြောင်းပြန်မလှည့်ပါဟု အစိုးရသစ်ခေါင်းဆောင်များကလူသိရှင်ကြားအကြိမ်ကြိမ်ပြောနေသည်။

ဤအချက်ကိုကောင်းစွာလက်ခံပါသည်။ အကြောင်းမှာပြန်လှည့်ချင်၍လည်း

မရနိုင်တော့သောအခြေအနေသို့ ဆိုက်ခဲ့ပြီဖြစ်သောကြောင့်ပင်။ (သဘောမတူသူများရှိပါကနောက်မှသီးခြား ဆွေးနွေးပါမည်)
အစိုးရကိုယ်တိုင်ပင်လျှင်နောက်ကြောင်းပြန်မလှည့်နိုင်တော့သော ဒီမို ကရေစီကူးပြောင်းရေးကိုအခြားမည်သူမျှလည်းပြောင်းပြန်မလုပ်နိုင်တော့ပါ။ 

၂၀၀၈ ဖွဲ့ စည်းပုံနှင့် ၂၀၁၀ ရွေးကောက်ပွဲကိုလက်မခံသူများ၏
အထွဋ် အထိပ်ခေါင်းဆောင်ဖြစ်သောအောင်ဆန်းစုကြည်ကိုယ်တိုင် ၂၀၀၈ လမ်းကြောင်း၏ချန်ပီယံဘ၀ရောက်လာတော့မည့်ခြေလှမ်းအထင်အရှား ပြင်နေပြီ။

ယခုထောင်ထည်းမှာကျန်နေသူများသည်သူမကိုမျက်စေ့စုံမှိတ်
ထောက်ခံခဲ့ကြ၍ထောင်ထည်းရောက်သွားသူများဖြစ်သည်။   

သူတို့ အားလွှတ်ပေးလိုက်လျှင်ရုပ်ရုပ်သဲသဲပြန်လုပ်ကြဦးမည်လား။ 
အဖြေမှာ - ဇာဂနာကိုကြည့်ပါ - ဟုသာပြောမည်။ ထို့ ကြောင့် မရမနေအဖြေရှာကြည့်မည်ဆိုလျှင်သူတို့ နှင့်ပြည်ထဲရေးဌာနအကြား 
ခံဝန်ချက်ကိုလက်မှတ်ထိုးပေးရေး-မထိုးရေး ဇွဲချင်းပြိုင်နေကြတာ ဖြစ်နိုင်သည်။

ဖွဲ့ စည်းပုံသစ်အရပြည်ထဲရေးဝန်ကြီးဌာနကိုတပ်မတော်ကတိုက်ရိုက် ကိုင်ထားကာဒုတိယဗိုလ်ချုပ်ကြီးတစ်ဦးက၀န်ကြီးလုပ်နေသည်။ 
စစ်တပ်နှင့်ကျောင်းသားပဋိပက္ခကိုနှစ်ဘက်စလုံးဆက်၍မွေးမြူထားကြ 
သည့်အနေမျိုးမြင်ရသည်။ အပြောင်းအလဲကြီးအတွင်းကမပြောင်း 
လဲသေးသောအရာ (continuity within the change) တစ်ခု -

ဤနှစ်ဘက်ဇွဲချင်း ‘ခတ်’ နေကြသည်ကိုအောင်ဆန်းစုကြည်ကော၊
ဦးသိန်းစိန်ပါကြားဝင်သည့်ပုံမပေါ်။ သူမအနေဖြင့်ကား ဒါပုဂ္ဂိုလ်ရေး
ဂုဏ်သိက္ခာအတွက်တိုက်ပွဲ-ကြားဝင်ရန်မသင့်ဟုယူဆ၍ဖြစ်နိုင်သည်။ 
သမတကြီးအနေဖြင့်ကားစစ်တပ်အပေါ်သြဇာမရှိ၍သာဟုယူဆရသည်။
ထို့ ကြောင့်ပင် ‘နိုင်ငံရေးအကျဉ်းသား’ မရှိ ဥပဒေကိုချိုးဖေါက်၍ပြစ်ဒဏ်
ကျခံနေရသူများသာရှိသည်ဟူသောပြည်ထဲရေးဌာန၏ 'ပုလိပ်အမြင်’ကို
လိုက်ပြောခဲ့ခြင်းဖြစ်မည်။

နောက်မကြာခင်ပို၍ပရိဿတ်နားခံသာမည့် ‘ယုံကြည်ချက်ကြောင့် 
အကျဉ်းကျခံများ’ သို့ စကားလုံး ပြောင်းသွားသည်။

မည်သို့ ဖြစ်စေဤ ‘ကုလားကြီး’ နှင့် ‘အရာကြီး’ စကားကပ်ငြင်းချက်ကိုကြာ ကြာလွှတ်ထားလျှင်ကုန်ကျမည့်နိုင်ငံရေးအဖိုးစားနား (political cost) ကို 
ဦးရွှေမန်းကတွက်မိပုံရသည်။ ဘယ်လိုပဲခေါ်ခေါ်သိပ်မကြာခင် -လူရွေး၍-
လွှတ်ပေးမည်ဟုပြောလာသည်။ ဟီလာရီကလင်တန်အားစကားကျွံထား 
ပြီးသားလည်းဖြစ်နေသည်။

စစ်ဘက်လက်ထဲရှိပြည်ထဲရေးဌာနနှင့်အထွေထွေအုပ်ချုပ်ရေးနှင့်နယ်စပ်ရေး ရာဝန်ကြီးဌာန၂ခုတို့ ကသာမန်ပြည်သူများ၏ဘ၀ကိုမည်မျှဆက်လက်ချုပ် ကိုင်ထားသနည်း။ မြင်နေကြားနေကြသောနိုင်ငံရေးမီးရှူးမီးပန်းများကနေ့  တဓူဝဘ၀မှန်ကိုလူထုအာရုံထဲမှာပျောက်နေအောင်ကွယ်ထားသလော။
ယ္ခုဖြတ်သန်းနေသောအသွင်ကူးပြောင်းရေးသည်အထက်ကလုပ်သောတော်
လှန်ရေး (revolution from above) တစ်မျိုးဖြစ်ပြီးအထိမ်းအကွပ်နှင့်ဖွင့်
ပေးခြင်း (controlled liberalization) ဖြစ်၍နှေးကွေးလိမ့်မည်ကိုမျှော်လင့် 

ထားကြပြီးသားဖြစ်ပါသည်။ 
သို့ သော်ရပ်နေသလား၊ရွေ့နေသလားမကွဲပြားသည်အထိတော့မဖြစ်သင့်။

ထို့ နည်းတူစီးပွားရေးဘက်တွင်(အဓိကအားဖြင့်ခရိုနီတွေအတွက်)
လမ်းဖွင့် ပေးနေမှုများကို (နိုင်ငံရေးအပါအ၀င်) မျက်နှာစာအားလုံး
အတွက်ဖွင့်ပေးနေခြင်းဟုယေဘူယျပြု၍အဓိပ္ပါယ်မကောက်ယူနိုင်။

အောင်ဆန်းစုကြည်ရွေးကောက်ပွဲဝင်ရန်ဆုံးဖြတ်လိုက်ကြောင်းသတင်းထွက် လာပြီးနောက်ပိုင်းကြားဖြတ်ရွေးကောက်ပွဲကိုနောက်သုံးလအတွင်းမကျင်း ပနိုင်သေးကြောင်းကအသံပြုလာသည်။ ဘာ့ကြောင့်ဟူ၍အကြောင်းပြချက် မပါ။ထို့ ကြောင့်သုံးလလောက်တော့စောင့်လိုက်၊သုံးလကျော်တာနဲ့ ကျင်းပ
ပေးမှာဘဲဟုတထစ်ချအဓိပ္ပါယ်ကောက်၍မရနိုင်ပါ။ 

အာဏာပိုင်များသည်အောင်ဆန်းစုကြည်ကိုရွေးကောက်ပွဲလည်းဝင်စေချင် သည်။ တကယ်ဝင်မယ်ဆိုတော့လည်းလန့် နေပုံပေါက်သည်။ အစိုးရအဖွဲ့  ကမလန့် လျှင်တောင်ကြံ့ဖွံ့ အမတ်တွေကလန့် နေနိုင်သည်။

အောင်ဆန်းစုကြည်နှင့်ပါတ်သက်၍အာဏာပိုင်များဘက်ကသဘောထား အမှန်ကိုမှန်းဆရခက်နေသည်။ သိရသမျှယနေ့ အထိတော့ NLD ပါတီ မှတ်ပုံတင်ခွင့်လျှောက်ထားခြင်းကိုခွင့်ပြုချက်ချမပေးသေး။အောင်ဆန်းစု ကြည်ကိုလွှတ်တော်စည်းဝိုင်းထည်းအချိန်မှီဆွဲမသွင်းဘဲနှောင့်နှေးနေလျှင် အခြားသူများထက်မိမိအကျိုးကိုပို၍ထိခိုက်စေလိမ့်မည်။

နိုင်ငံရေးပါတီများမှတ်ပုံတင်ဥပဒေကပြည်ထောင်စုရွေးကောက်ပွဲကော်မရှင် အားရွေးကောက်ပွဲကြီးကြပ်စေယုံသာမကနိုင်ငံရေးပါတီများကိုစောင့်ကြည့် ရန်ပါတာဝန်ပေးထားသည်။ ဤဥပဒေသည်နိုင်ငံရေးပါတီများကိုပြုစုပျိုး
ထောင်ပေးသည့်(ဒီမိုကရေစီကိုပြုစုပျိုးထောင်ပေးမည့်)ဥပဒေမဟုတ်ကြောင်း
အလယ်တန်းကျောင်းသားကလေးများကတောင်သိနိုင်သည်။ 

ဥပဒေ၏အနှစ် သာရ ချုပ်ကြည့်ပါကပုဒ်မပေါင်း ၂၇ ခုရှိသည့်အနက်
၂၀ကျော်သည်နိုင်ငံရေး ပါတီများကိုအဘက်ဘက်မှကန့် သတ်
ချုပ်ချယ်ထားသောပုဒ်မတွေချည်းဖြစ်သည်။ ကျန်ပုဒ်မများက
လည်းနိုင်ငံရေးပါတီများကိုအကူအညီမပေးပါ။ လုပ်ထုံးလုပ်နည်း 
(procedures, technicalities) ပြဌန်းချက်တွေသာ ဖြစ်သည်။

ရွေးကောက်ပွဲကော်မရှင်သည်နိုင်ငံရေးပါတီများကိုဖျက်သိမ်းပစ်သည်အထိ အရေးယူပိုင်ခွင့်ရှိကာ၎င်း၏ဆုံးဖြတ်ချက်သည်အပြီးအပြတ်ဖြစ်စေရမည် (ပုဒ်မ၂၀- က)၊ ၄င်းအားမည့်သည့်တရားရုံးတွင်မျှတရားစွဲဆိုခွင့်မရှိစေရ (ပုဒ်မ၂၀-ခ) ဟုပြဌန်းထားရာဤကော်မရှင်သည်လက်တွေ့ တွင်နိုင်ငံတော်၏
စတုတ္ထမြောက်အချုပ်အချာအာဏာပိုင်
(fourth sovereign power of the state) ဖြစ်နေသည်။

လွန်ခဲ့သောအောက်တိုဘာလအတွင်းနိုင်ငံရေးပါတီငယ်တစ်ခုဖြစ်သော
မတူကွဲပြားခြားနားခြင်းနှင့်ငြိမ်းချမ်းရေးပါတီ (PDP) မှဥက္ကဌကိုနေမျိုးဝေနှင့် ဂျာနယ်တစ်ခုမှအယ်ဒီတာတစ်ဦးတို့ မွန်ပြည်နယ်အတွင်းခရီးသွားခဲ့သည်။ ဤခရီးသည်လျှို့ ဝှက်ခရီးမဟုတ်ဘဲသူဘယ်သွား၍ဘာတွေလုပ်ခဲ့သည်။ ဘယ်သူတွေနှင့်တွေ့ ၍ဘာတွေပြောခဲ့သည်များကိုအွန်လိုင်းတွင်ဓါတ်ပုံများ
နှင့်တကွအပြည့်အစုံထုတ်ပြန်ကြေငြာခဲ့သည်။ သူသည်နိုင်ငံရေးခရီးများ ထွက်တတ်ပြီးခရီးစဉ်တစ်ခုပြီးဆုံးတိုင်းမဆိုင်းမတွအများသိရန်ဖြန့် ဝေစာ
တွေထုတ်ပေးလေ့ရှိသည်။ယ္ခုတစ်ခေါက်လည်းခါတိုင်းနည်းတူပင်။

ဤသွားလာလှုပ်ရှားမှုများသည်ဖွဲ့ စည်းပုံအခြေခံဥပဒေသစ်ကနိုင်ငံသား တိုင်းအားအပ်နှင်းထားသောလွပ်လပ်ခွင့်များ၏ဘောင်အတွင်းက သွားလာ တာဖြစ်ပြီးဥပဒေဖြင့်ညီညွတ်သည့်သဘောရိုး (bona fide) ဖြစ်ကြောင်း ထင်ရှားသည်။

သို့ သော်ယခုတစ်ကြိမ်မွန်ပြည်နယ်သို့ သူ၏ခရီးအားရွေးကောက်ပွဲကော်မ ရှင်ကသူတို့ ဘယ်နေ့ ဘယ်အချိန်ဘယ်နှစ်နာရီတွင်ဘယ်အိမ်သို့ ရောက်ကာ
ဘယ်သူနှင့်တွေ့ သည်၊ဘယ်မှာညအိပ်တည်းခိုခဲ့ကြောင်း၊ ပြည်နယ်ကော်
မရှင်ကိုသော်၎င်း၊ မြို့ နယ်/ရပ်ကျေးအုပ်ချုပ်ရေးအာဏာပိုင်များကို၎င်း ကြိုတင်အကြောင်းမကြားခဲ့ကြောင်း၊“ရိုးသားပွင့်လင်းမှုအားနည်းကြောင်း”
နေပြည်တော်မှတိုက်ရိုက်ဖြန့် ဝေသည့်သတိပေးစာလုံးလိုလိုကြေငြာချက် တစ်စောင်ထုတ်ကာကော်မရှင်အဆင့်ဆင့်များသို့ ပေးပို့ ခဲ့လေသည်။ 

PDP သည် ၂၀၀၈ အခြေခံဥပဒေနှင့် ၂၀၁၀ ရွေးကောက်ပွဲကိုအသံအကျယ် ဆုံးထောက်ခံကာ၎င်းရှိသမျှအင်အားဖြင့်အစိုးရသစ်၏လမ်းပြမြေပုံနိုင်ငံရေးလမ်း
ကြောင်းအတိုင်းလိုက်ပါရန်ခက်ခဲစွာရုန်းကန်နေရသောပါတီငယ်တစ်ခု သာဖြစ်သည်။ အစိုးရအတွက်ဘယ်လိုမှအန္တရယ်မရှိ။  

ထို့ ပြင်နိုင်ငံရေးသမားများနိုင်ငံရေးခရီးထွက်သည့်အခါမီဒီယာသမားများ လိုက်ပါသတင်းယူသည့်အလေ့သည်အခြားဒီမိုကရေစီနိုင်ငံများတွင်ဘာမှ မထူးဆန်းသောကိစ္စတစ်ခုဖြစ်သည်။

PDP ၏မွန်ပြည်နယ်သွားခရီးကိုပြည်ထောင်စုကော်မရှင်ကလူဆိုးထိမ်းပုလိပ် အလားအတိအကျလိုက်လံမှတ်တမ်းနှင့်တကွဖေါ်ပြ၍သတိပေးသယောင်
ယောင်စာထုတ်နေသည်မှာဘာအဓိပ္ပါယ်ဆောင်သနည်း။

နိုင်ငံရေးပါတီတစ်ခုသည်မိမိမှတ်ပုံတင်ထားဧရိယာပြင်ပကျော်၍(နိုင်ငံရေး) ခရီးထွက်လျှင်ကော်မရှင်ကိုသော်၎င်း၊ ဒေသခံအာဏာပိုင်များကိုသော်၎င်း
‘အသိပေးသင့်ကြောင်း’ ဟူသည့်ခံစားချက်နှင့် ‘ရိုးသားပွင့်လင်းမှုအားနည်း’ 
သည်ဟူသောမှတ်ချက်များက - မိမိတို့ ကိုဘာမဆိုအကုန်အသိပေးရမည် ဆိုသောခေတ်ဟောင်းထောက်လှမ်းရေးနိုင်ငံတော် (Police state) ၏အစွဲ 
အလမ်းတွေမကုန်သေးတာ၊ ထိုသို့ အသိမပေးမိလျှင် မရိုးသားတာဘဲဖြစ်ရ မည်ဟုလူတိုင်းကို‘တရားခံလောင်း’ (potential criminal) အဖြစ်သတ်မှတ်
နေသောမယုံသင်္ကာ ‘ပုလိပ်စိတ်ဓါတ်’ကိုလှစ်ပြရာရောက်နေသည်။ 

ဤသည်မှာအုပ်ချုပ်ရေးပိုင်းတွင်မည်မျှဒီမိုကရေစီအသိအားနည်းနေသေး
ကြောင်းနိုင်ငံတော်အဆင့်ကသွားနေသောနိုင်ငံရေးလမ်းကြောင်းသစ်နှင့် လက်အောက်ခံအဆင့်များမည်မျှဖီလာဖြစ်နေသေးသည်ကိုပြသနေသည်။

နိုင်ငံရေးပါတီများအဖို့ ပြည်သူတို့ ၏ဒီမိုကရေစီအခွင့်အရေးများကိုအကောင် အထည်ဖေါ်ပေးရေးအတွက်တည်ထောင်ခဲ့ကြသည်မှန်သော်လည်းမိမိတို့ ၏
နိုင်ငံရေးအခွင့်အရေးများအတွက်ပထမအကြိုးစားရဦးမည့်ပုံပေါက်နှေသည်။
ဘောင်ထည်းကပဲရသလောက်လှုပ်ရှားမည်ဟုစိတ်ပိုင်းဖြတ်ထားကြသူများ အတွက်ဆိုလျှင်မိမိတို့ ကအနေကြုံ့ ပေးလိုက်သလောက်ဘောင်ကလိုက်ပြီး ကျဉ်းသည်ထက်ကျဉ်းလိုက်လာသည်နှင့်ကြုံရနိုင်သည်။ 

လုပ်ငန်းသဘာဝအရဒီမိုကရေစီကိုရှေ့ ကနေဖေါ်ဆောင်သွားနေသူမှာဥပဒေ
ပြုပြည်ထောင်စုလွှတ်တော်ကြီးဖြစ်သည်။ 

သို့ သော်လွှတ်တော်ကပြုသမျှဥပ ဒေတွေကိုလက်တွေ့ အသုံးမချနိုင်။
သက်ဆိုင်ရာဝန်ကြီးဌာနတွေ၊ ဦးစီးဌာနတွေက “စည်း ၂ စည်း - မိန့်  - ညွှန် - လုပ်” 
(စည်းမျဉ်းဥပဒေ၊ စည်းကမ်းဥပဒေ၊ အမိန့် ၊ ညွှန်ကြားချက်နှင့်လုပ်ထုံးလုပ်နည်း) ဆိုတာတွေထုတ်ရသေးသည်။ သမတကြီးကလက်မှတ်ထိုး၍ဥပဒေ
ဘ၀ရောက်လာသည့်တိုင်ပြည်ထောင်စုဝန်ကြီးဌာနတွေက မိမိတို့ ဂွင်’ 
ထဲကနေ ‘ထစ်’ထားကြလျှင်‘တစ်’နေဦးမည်။

မကြာမီကသမိုင်းဝင်မည့်အလုပ်သမားသမဂ္ဂများတရားဝင်ထူထောင်ခွင့်နှင့် လမ်းများပေါ်တွင်ငြိမ်းချမ်းစွာလူစုလူဝေးနှင့်ဆန္ဒပြနိုင်ခွင့်ဥပဒေ ၂ ခုကိုလွှတ် တော်ကပြဌန်းပေးခဲ့သည်။ဒီမိုကရေစီ၏အဓိကပြယုဂ်ကောင်းများဖြစ်သည်။ သို့  သော်လက်တွေ့ တွင်ဝန်ကြီးဌာနတွေက စည်း/မိန့် /ညွှန်/လုပ်’ တွေပြ ဌန်းမပေးသေး။ စောင့်ကြရဦးမည်။

ထို့ ကြောင့်ဆန္ဒပြခွင့်ဥပဒေထွက်လာပြီဆိုသောသတင်း၊ အလုပ်သမားသမဂ္ဂ တွေဖွဲ့ ခွင့်ရပြီဆိုသောသတင်းများသည်
မှန်ပင်မှန်ငြားသော်လည်းမီးရှူးမီးပမ်းတွေသာဖြစ်နေသေးသည်။
တကယ့်လက်တွေ့ ဘ၀တွင်ထီပေါက်ပြီ၊လက်မှတ် တော့ရှာလို့ 
မတွေ့ သေးဖြစ်နေကြသည်။ ‘ပေးကားပေး၏ - မရ’ ဖြစ်နေကြသည်။ 
ဘယ်လောက်ကြာကြာစောင့်ရမလဲ၊ ဘယ်သူမှမသိ။

ဒီမိုကရေစီနိုင်ငံများတွင်အများပြည်သူသိချင်နေသောကိစ္စရပ်များကို
သတင်းသမားက၄င်း၊ နိုင်ငံသားတစ်ဦးဦးကသော်၎င်းသက်ဆိုင်ရာ
အစိုးရဌာနတိုင်းသို့ ဖုံးဖြင့်၎င်း၊ကိုယ်တိုင်သွား၍၄င်းမေးမြန်းစုံစမ်းပိုင်
ခွင့်နှင့်ပြန်လည်ဖြေကြားပေးရန်ကိုဥပဒေပြုလုပ်ပြဌန်းပေးထားသည်။ 
ကနေဒါတွင်ထိုဥပဒေကို Freedom of Information Act ဟုခေါ်သည်။ 

အနှစ်သာရမှာထင်သာမြင်သာရှိရေး (Transparency) ဖြစ်သည်။ ၀န်ကြီးဌာနတိုင်းကိုယ့်ကိစ္စကိုယ်တိုက်ရိုက် ဖြေခွင့်ရသဖြင့်ထိရောက်သလို
ဗဟိုချုပ်ကိုင်မှုကိုဖြေရာလည်းရောက်သည်။ (decentralization)

ဤနည်းကိုမြန်မာပြည်အတွက်လွယ်ကူစွာအတုယူနိုင်သည်။ 
လုပ်ချင်စိတ် (political will) ရှိကြဖို့ သာလိုအပ်သည်။  
အချုပ်အားဖြင့်ပြောရလျှင်ဒီမိုကရေ စီဘက်သို့ ခြေလှမ်း
တိုင်းနိုင်ငံရေးမီးရှူးမီးပမ်းလွှတ်တာမျိုးထက်တကယ့်လက်တွေ့  
ဘ၀ထည်းဆိုက်ရောက်လာရေးအတွက်လက်ရှိအုပ်ချုပ်ရေး 
ယန္တယား ကြီးကိုသည်အတိုင်းဆက်သုံးမနေဘဲ အကြီးစား
ပြင်ဆင်မှုတစ်ခု ( a major overhaul) လုပ်ဘို့ လိုနေပြီ။

မြန်မာသံတော်ဆင့်
         

No comments:

Post a Comment